كرسي الاعتراف الجزء التاني

.::+[ كرسي الإعتراف ]+::.

وهو عبارة عن كرسي يجلس فيه العضو لمدة اسبوع...

ويتمــ طرح عليه الاسئلة من قبل الاعضاء والموجودين في هذا المنتدى...

.::+[ قوانين كرسي الإعتراف ]+::.

1-اللباقة في الكلامــ والاسلوب في السؤال واحترامــ العضو ,, مهما كانت الاوضاع ,, عدم التلفظ بكلمات غير لائقة او بذيئة تمس الضيف .

2- يحق للضيف الاحتفاظ بهويته الشخصية ,, وليس مجبراً على البوح بخصوصياته .

3- الابتعاد عن الأسئلة الشخصية الخاصة ..
>>..<<

4- عدمــ النقل الأعمى للأسئله, ويفضل ان تكون الأسأله من اعداد العضو شخصيا .

5- عدمــ تجريح من يسأل او من يجاوب والتقليل من شآن الآخرين .

6-

7- ضرورة تأكد كل عضو من عدمـــ تكرار السؤال والا سيحذف السؤال دون الرجوع للعضو نفسه.

8 -يتم اختيار العضو من خلال ترشيح من الاعضاء او من المشرفين علي الكرسي

9- امكانيه جلوس المشرفين علي الكرسي وعددهم 2 علي الكرسي طبعا بناء علي رغبه الاعضاء

10- اذا وضعنا ضيف على الكرسي ,, ولم يكمل الاسبوع ,, وواجهته ظروف خاصة,, له الحق في التعويض ,, وسيتم قفل الموضوع ,, الى حين يرجع العضو.

بعد غياب

بافكار جديده

dr_h14مشرف كرسي الاعتراف هو العضو

dr.lobna وامشرفه كرسي الاعتراف هي العضوه

ويتم تحديد العضو القادم خلال اليوم بناء علي الترشيح او راي المشرفين

انا برشح اوووووووووووول عضو انه يبقي مستر مجدي................

مستني رايكو؟؟؟؟؟؟؟؟؟؟؟؟؟؟؟؟؟

أوكي معاكم وحكاية القفل والفتح وأي حاجة أنا موجود أو أي حد في هيئة الإشراف

بس أنا عندي إقتراح مش إنت اللي تختار العضو إنت أخترت المستر أوكي المستر يختار اللي بعده

أوكي

لأن إنت هتشوف ناس محددة في دماغك لكن أما كل عضو هنوع العملية وكل واحد يختار عضو بمزاجة وفكرة

رائعة وإنتظروااااا البنر للعبة والتثبيت قريبا

Update

برده مش عايز كل شوية العضو يدخل يجاوب كل شوية
لا الأعضاء يبعتوا أسئلة للعضو وكل عضو سؤال
وبعد كده في نهاية الفترة
إنت تجمع الأسئلة مع بعضها وتضيف رد بيه
والعضو اللي علي الكرسي يدخل يرد مجمع عالطول

حلوه التعديدلات بتاعتك يا محمود وتبقي موجود ه ان شاء الله

خلاص ماشي يا جماعه لو مش عاجبكوا اللعبه اوك عادي

يلا يا جماعه المستر معانا علي الكرسي دي فرصه مش هتتعوض

وانا هبقي اول واحد يسال ان شاء الله

I am ready to answer any questions

الاول ازيك يا مستر عامل ايه ؟؟؟؟ مش عايزينك نغيب هننا تاني

الاسئله :

1_ممكن تعرف نفسك تعريف شامل؟؟؟؟؟

2_انت سعيد بوجودك معانا في المنتدي وايه اللي ممكن يضايقك ونت معانا سواء من تصرفاتنا او اي حاجه ؟؟؟؟؟؟؟؟؟؟

3_ايه هيا هواياتك المفضله واكتر حاجه بتحبها ؟؟؟؟؟؟؟؟؟؟؟؟؟؟

ايه الحلم اللى حلمته وحققته وايه الحلم اللى بتحلم بيه ولسه متحققش
ايه اكتر موقف محرج حصلك فى حياتك ؟
ايه اكتر لحظه حسيت بالسعاده فيها؟

اولا ازى حضرتك يا مستر انا هسأل

1-ايه هو اكتر مكان حضرتك بتحب تروحه فى الاجازات او الاوقات الفاضيه يعنى المكان المفضل؟؟؟؟؟

2-مين اكتر حد فى حياه حضرتك ممكن تضحى عشانه ؟؟؟

ايه اكتر حاجه غاليه عليك؟؟؟

حققت كل احلامك ولا لسه؟؟؟

ايه هو كتابك المفضل؟؟ الي بتحب تقراه يعني؟؟

ازيك يا مستر مجدى؟؟ان شاء الله تكون بخير

1-هل انت راضى عن نفسك؟؟
2-ماذا تحب ان تعشق ف دنياك؟؟
-اذا وهبك الله جناحين لفترة قصيرة..الى اين ستذهب؟؟

انا حاسس ان الاسئله هاتكتر هاجاوب على الموجود
1- دكتور حسن ( المبتكر )

الاسئله :
1_ممكن تعرف نفسك تعريف شامل؟؟؟؟؟

انااسمي/ مجدي محمد فرحات ، 39 سنه ، مدرس تكنولجيا كهرباء والكترونات ثانوية بنات ، متزوج وعندي محمود وايمان

2_انت سعيد بوجودك معانا في المنتدي وايه اللي ممكن يضايقك ونت معانا سواء من تصرفاتنا او اي حاجه ؟؟؟؟؟؟؟؟؟؟
سعيد فوق ماتتصور تقدر تقول (سعيد صالح) اقصد سعيد خالص واللي بيضايقني معاكوا
لما باحس ان فيه حد مخنوق مني وعاوز يولع فيا بجاز ودول والحمد لله كتير ههههههه
لا بجد فعلا باتضايق اما باحس ان فيه ناس رافضه وجودي ومحرجين يقولولي وده طبعا انا على استعداد له طالما هايحل ازمه عند الاعضاء وكمان في ه شيئ مستجد نفسي فعلا احساس الاسرة الواحده يوصل بجد للكل من غير شعارات وبلاش حكاية الشلل والفرق
انا عارف اني هازعل ناس بس معلش الصراحه راحه وانا باحب الجميع جدا بلا مبالغه

3_ايه هيا هواياتك المفضله واكتر حاجه بتحبها ؟؟؟؟؟؟؟؟؟؟؟؟؟؟
القراءة قبل كل شيئ وثانيا الكتابة وكرة القدم بالرغم من ضخامة هيئتي والشطرنج واكتر شيئ احبه لما بانهي زجل او شعر ويكون هادف والناس تحبه
*************************************************************************
2- الابنةالمتسائله والمتعجبة ؟؟؟؟؟!!!!!!
الاسئلة:
1- ايه الحلم اللى حلمته وحققته وايه الحلم اللى بتحلم بيه ولسه متحققش
الحلم اللي حققته هو اني ابقى مدرس او محامي وحققت اني اكون مدرس وممكن جدا وعلى وشك اني اكون كمان محامي ههههههههه ومحمود عجيز عارف ده كويس
الحلم اللي ماتحققش اني ازور الكعبة ومسجد الرسول وخايف اني مقدرشي احققه
2-ايه اكتر موقف محرج حصلك فى حياتك ؟
اكتر موقف محرج اني اتعرفت على صديق ليه اسمه ايمن مسيحي وواحد عرفنا على بعض وقاله استاذ مجدي فرحات وهو حسب اني مسيحي زيه وبقى مبسوط وقعد ياخد ويدي في الكلام معايا على اساس اني مسيحي واخر ما زهقت قلتله انا اسمي مجدي محمد محمد واتكيت اوي على محمد دي فسكت ووشه احمر وبعدين دامت بيننا صداقه الى الان
ايه اكتر لحظه حسيت بالسعاده فيها؟
ولادة ابنائي محمود وايمان وانا باشيلهم وباذن في اذنهم وفيه لحظه اكثر سعاده بس دي غلاسه مش هاقولها لانها ذكرى قديمة مش ملكي وحدي عشان اقولها .
**************************************************************************
ابنتي سومه ( السحابه الصيفيه )
الاسئله :
-ايه هو اكتر مكان حضرتك بتحب تروحه فى الاجازات او الاوقات الفاضيه يعنى المكان المفضل؟؟؟؟؟
البحر او النهر ( خضرة وماء )اي مكانفيه الاتنين دول يعني ممكن حزمة فجل وقلة يقضوا الغرض .
2-مين اكتر حد فى حياه حضرتك ممكن تضحى عشانه ؟؟؟
امي ثم اولادي ثم زوجتي .
**************************************************************************
[u]Gihan nemo ابنتي ( جيهان) (الابتسامة الدائمة )واللي هايجنني يعني ايه نيمو[/u]
الاشئلة
1- ايه اكتر حاجه غاليه عليك؟؟؟
لو تقصدي هديه ( جواب بعته ولي امر ليه لاني بفضل الله اقنعت ابنه يرجع للدراسه ) ام لو اشخاص فهم باردوا على الترتيب امي واولادي ثم اخواتي وزوجني
حققت كل احلامك ولا لسه؟؟؟
ماحققتش غير حلم اني اكون مدرس وبس اما الباقي لسه ودول كتير

ايه هو كتابك المفضل؟؟ الي بتحب تقراه يعني؟؟
طبعا القرآن وعشان ماتقولوش ده بني ادم خنيق وهايعملنا شيخ ماحنا عارفين انه القرآن لازم الفصاحه اوك اوك خلاص فيه كتاب رائع اسمه ( لاتحزن ) لابي عائض القرني وانصح الكل يجرب بنفسه ويشتريه ومش هاتندموا ....
************************************************************************** دكتورة لبنى ( الابنة الرقيقه )
الاسئله :-

1-هل انت راضى عن نفسك؟؟
لا طبعا لاني فعلا مش على القدر اللي يرضي نفسي عني فيه تقصير وسلبيات وعيوب كتييير اوي اسئل الله العفو والعافية
2-ماذا تحب ان تعشق ف دنياك؟؟
انا اعشق الهدوء وصوت البحر وضحكة الاطفال ودموع الندم وطول السجود ومصاحبة الصالحين والقرب من المذنبين لاني واحد منهم لعلنا نخرج من غفوتنا الى يقظة الهدايه
-اذا وهبك الله جناحين لفترة قصيرة..الى اين ستذهب؟؟
والله العظيم لن اتردد في تحقيق حلمي بان اسافر الى مكة الى بيت الله الحرام ومسجد الرسول بالدينة لانه اهم احلامي وبعدين لو فيه وقت هاروح اطمن على ناس ماشفتهمش من 16 سنة ونفسي اشوفهم بس هما مايشوفونيش وده طبعا هايحصل لان هادخلهم من السطوح زي حرامية الغسيل ..

شكرا يا مستر علي اجاباتك الجامده جداااااااااا زي العاده وزي ما كنت اجمد اجايات في البارت الاول شكلك كده هتبقي اجمد واحد في البارت التاني

وعلي الرغم من انك رديت بدري من غير ما نحمعلك الاسئله (وفلاتها علينا )

ولسه يا جماعه معانا المستر علي الكرسي للي يحب بساله في اي حاجه من اللي قولنا عليه

بص يا مستر بقي الاسئله بتاعتي هيا اللي هتجيب معاك من الاخر
ودي طبعا اسئله لالااذطساء فقط

1_قطار يسير بسرعه 100 كيلو متر/ساعه احسب سرعه ارتداد المحطه علما بان سعر زجاجه البيبسي 1.25 جنيه؟؟؟؟

2_ لو عندنا برتقانه وعايزين نقسمهم علي شخص واحد نقسهما ازاي؟؟؟؟

3_ قال الشاعر تامر حسنى ** انا مش عارف اتغير **
حدد سبب عدم قدرتة على التغير علما بان سرعه التغير ((142 م /خ ))[/color]

كمان سؤال اهوه

سي دي لي لي عيني لي لي

اذكر اسم الشاعر والي اي مدرسه شعريه ينتمي و ووماهي العاطفيه الشعريه المسيطره علي الشاعر

وهل يسمي هذا البيت بالبيت الذي قتل صاحبه

طبعا يا مستر الاسئله دي بس من باب الدعابه مع حضرتك علشان بقيت الاعضاء خايفين جدااااااااااااااااااااااا من الموضوع ومحدش عايز يشترك خايفين من علاء صادق بتاع الاسئله بقولهم يا جماعه متخافوش دي عامله زي شكه الابره

انا بقي هسال شويه اسئله لولبيه يا مستر كده وياريت متكنش هتضايقك:

1)ايه اكتر حاجه عملتها وندمت عليها ف حياتك كلها واتمنيت لو رجع الزمن بيك وغيرتها؟؟

2)ايه اكتر موقف احزنك في حياتك ومين اكتر شخص بكيت عشانه؟؟

3)لو طلعت رحله بعيد عن العالم كله .اختار شخصين يكونو معاك في تلك الرحله.

4)اي هما اكتر تلت حاجات متحبش تعملهم حياتك كلها؟؟

5)حضرتك بتحب الاجتماعيه ولا الانطوائيه وهل حضرتك شاي ان الانطوائيه مطلوبه؟؟

شكرا جزيلا واتمنى مكنتش تقلت علي حضرتك.

انا باردوا من باب التشجيع هارد عليك يا د/ حسن يا حبيبي
[color=white]الاسئــــــــــــــــــــــــــــــــــــــــــــــلة
_قطار يسير بسرعه 100 كيلو متر/ساعه احسب سرعه ارتداد المحطه علما بان سعر زجاجه البيبسي 1.25 جنيه؟؟؟؟
طبعا الاجابة ( فانتا كركديه الجديده )

2_ لو عندنا برتقانه وعايزين نقسمهم علي شخص واحد نقسهما ازاي؟؟؟؟

نقسمها اربع تربع علشان يعرف يا كلها وطبعا ماينفعشي نقشرها لانك قلت نقسمها ازاي ( يا حدق )
3_ قال الشاعر تامر حسنى ** انا مش عارف اتغير **
حدد سبب عدم قدرتة على التغير علما بان سرعه التغير ((142 م /خ )[/color]
لان هناك قاعده معروفه تنص على انه ( نهيتك مانتهيت والطبع فيك غالب وعمر ديل الكلب ما ينعدل ولو علقه فيه قالب )
وهناك نظريه تقول (ان جه للحزينه 100 اردب هي حزينه وتشتهي الحب ( بفتح الحاء ) مش ضمها ياوحش

سي دي لي لي عيني لي لي

اذكر اسم الشاعر والي اي مدرسه شعريه ينتمي و ووماهي العاطفيه الشعريه المسيطره علي الشاعر
اسم الشاعر ( سيد حلبسه ) وهو شاعر جاهلي وابن جاهلي باردو وينتمي الى المدرسه الشعريه ام لبن ودي طبعا رهيبه ربنا يوعدنا وياريت تزود السكر ولا اقولك خاللي السكر بره

وهل يسمي هذا البيت بالبيت الذي قتل صاحبه
ممكن تسميه كده وممكن تسميه عبده على اسم ابن خالته ربنا يحرسهم هما الاتنين
**********************************************************************
ندخل على الاسئلة اللولبيه ( دكتور هلال ) صديقي الرائع

1)ايه اكتر حاجه عملتها وندمت عليها ف حياتك كلها واتمنيت لو رجع الزمن بيك وغيرتها؟؟
مش عارف اقول ايه بصراحه سؤال كنت خايف اتسأله ويبدو ان حظي العثر اوقعني فيك يا ابو حميد المهم هو موقف كنت فيه سلبي وضعيف جدا وده كان من قوة شخصية الوالد الله يرحمه وتخليت فيه عن انسانه كنت متعلق بيها جدا والغريب اني لو رجع الزمان بيا كنت هاعمل نفس الموقف لاني مقدرشي اعصي ابويا الله يرحمه
2)ايه اكتر موقف احزنك في حياتك ومين اكتر شخص بكيت عشانه؟؟
نفس الشخصيه ونفس الموقف ومازال الدمع جاري يا صديقي لا اراك الله مثله

3)لو طلعت رحله بعيد عن العالم كله .اختار شخصين يكونو معاك في تلك الرحله.
محمود وايمان اولادي ولو كانت الشخصيه الاولى دي موجودة كنت اكيد خدتها معايا

4)اي هما اكتر تلت حاجات متحبش تعملهم حياتك كلها؟؟
ماحبش اكون سبب في بكاء طفل لان ده اكتر شيئ يضايقني ، ماحبش اظلم حد او اتسبب في قهره ، ماحبش اكون في الظل يعني اكون او لا اكون

5)حضرتك بتحب الاجتماعيه ولا الانطوائيه وهل حضرتك شاي ان الانطوائيه مطلوبه؟؟

انا اجتماعي بطبيعتي ولكني استمتع بالانطواء عند اداء عباداتي او كتاباتي

انا بقى جيت يا مستر....احم احم

السؤال الاول

مين اكتر انسان بتسريح له نفسيا لما بتكون معاه وبتحب تحكيله وتفضفضله؟

السؤال الثانى

أكتر موقف ضايقك..وياترى كان لحضرتك دور ايجابى فى الموقف دة

السؤال الثالث

لو حبيت تدى اغلى نصيحه لمحمود ابن حضرتك تقوله ايه كولد ولايمان بنت حضرتك كبنت

السؤال الرابع

ايه اكتر سؤال محرج حضرتك اتسألته؟

السؤال الخامس والاخير؟ علشان حضرتك مش تخنقنى

لو قولت لحضرتك ماذا تعنى لك كلمه ..الحب..القسوه..العاطفه...الشك

بالتوفيق ان شاء الله وبتمنى من حضرتك النجاح فى الرد على كل الاسئله

ايه ده لألسه فيه سؤال معلشى يا مستر

لو حبيت تهدى العباره اللى فى الصورة لحد ...ياترى تهديها لمين

سورى يا مستر طولت عليك

الابنه العزيزة نورا ( منسقة المنتدى والمبدعة دوما )
السؤال الاول

مين اكتر انسان بتسريح له نفسيا لما بتكون معاه وبتحب تحكيله وتفضفضله؟
زوجتي اكتر انسانه بتسمعلي وطيبتها وشخصيتها الجميله بتخليني اقول كل شيئ ليها وكثيرا ما اجد عندها ما يطمئن قلبي وعقلي له ..

السؤال الثانى

أكتر موقف ضايقك..وياترى كان لحضرتك دور ايجابى فى الموقف دة
ولد ومعاه واحده تقريبا خطيبته او زوجته وكانت معاهم ام الولد الولد بكل جنتله نزل وخد ايد خطيببته وشبكوا صوابعهم بكل قلة ادب وساب امه وكانت سيده عجوز لا تستطيع النزول بمفردها ما كان مني الا نزلت وساعدت الام على النزول وناديت على الولد وقلتله دي تتعوض ودي لا وقلت للبنت لو مالوش خير في امه عمره ماهيكون له خير فيكي وبصراحه مانطقوش خالص ماسكتش برخامتي المعهودة وقلتله امسك بايدك التانيه ايد امك بس كان نفسي اضربه بس اللي منعني انه ماردش عليا ومسك امه وساب ايد خطيبته ..

السؤال الثالث

لو حبيت تدى اغلى نصيحه لمحمود ابن حضرتك تقوله ايه كولد ولايمان بنت حضرتك كبنت
نصيحة محمود
هاقوله انت ليك اخت ومالكشي اخوات صبيان ولاد اعمامك هما زادك وسندك واختك هي امك وانت ابوها بعد مانموت خليك راجل عنيك في السما مش تعالي لا بص دايما لربنا واطلب منه اي شيئ هتلاقيه واعرف انه كما تدين تدان اذا زرعت شرا مع اي بنت هاتحصده من اختك او امك وكفايه كده علشان ما خنقووش مني
اما ايمان
هاقولها انتي ام اخيكي وهو ابيكي وستكونين اخت وصديقة وام لزوجك ان شاء الله
لكي كل ما تحبي ولكن ليس لكي ان تعصي الله (وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ وَلا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُوْلِي الإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُونَ) وكفى بكلام الله وصية

السؤال الرابع

ايه اكتر سؤال محرج حضرتك اتسألته؟
لو في كرسي الاعتراف سؤال هلال الخاص باكثر موقف المني ولو رجعت لورا اعمل ايه وهو مش محرج هو صعب وماكنتش عاوز اتساله
اما لو سؤال محرج في حياتي عامة
لما اكون مش عايز اعرف شخص معين ويواجهني بالسؤال انت مش عايز تكلمني او تعرفني
وده بيخليني مضطر للكدب لاني فعلا لا استطيع ان اجرح مشاعر شخص

السؤال الخامس والاخير؟

لو قولت لحضرتك ماذا تعنى لك كلمه ..الحب..القسوه..العاطفه...الشك

الحب -
اروع مخلوق خلقه سبحانه وتعالى ولكن للاسف اصبح كلمة ممطوطه وجدار تختبئ وراءة النوايا السيئه وغرائز وشهوات رخيصة وفانية
القسوة-
نخطيئ حينما نطلق على من يفعلها بالحيوان فليس هناك حيوان قاسي ولكنها من اختراع الانسان الذي فقد المشاعر النبيله حينما فقد ايمانه بالله
العاطفة-
عكس القسوة ومنها اشتق العطف والعواطف كلمات رقيقه واحاسيس مرهفه تقوى بالعبادات وتزيد قوة كلما زاد ايماننا بالله سبحانه وتعالى

الشك -
احد اعراض مركبات النقص الانسانية وفقدان الثقه بالنفس وبمن حولنا وهو من قال فيه سبحانه وتعالى اجتنبوا كثيرا من الظن ان بعض الظن اثم اسال الله العفو والعافيه
السؤال السادس
لو حبيت تهدى العباره اللى فى الصورة لحد ...ياترى تهديها لمين
والله لكتير اوي
[u]اولا : لنعمة الله علي وستره ورعايته[/u] اتمنى الا احرم منها بما اقترفه من ذنوب .
ثانيا : امي اسال الله لها طيلة الاجل وحسن العمل وعافية في البدن امين يارب.
ثالثا : اولادي وزوجتي ربنا يحفظهم ويرعاهم ويجعلهم من السعداء في الدنيا والاخرة
رابعا : المنتدى الجميل ده وانتم اللي بصدق ويعلم الله اني اشعر اني مع ابنائي محمود وايمان بس وهما كبار هههههههههههههه....
ربنا مايحرمنا من كرمه ونعمته فجمعنا هذا نعمة من الله تستوجب الشكر والحمد

سلام عليكم...... ازى حضرتك يامستر

انا بقى بتاعت مصلحتى شويه... هاخد من حضرتك شويه نصائح كدة على الماشى:-

** بم تنصح شخص يجرح الاخرين دون ان يشعر... وده طبعا نتيجة العصبية الزيادة ؟

** بم تنصح شخص تقف كلمات الاعتذار فى حلقه فلا يستطيع اخراجها ودائما يبتلعها؟

** طبعا واضح ان حضرتك بتحب هاملت جدا علشان كدة اختارت اسمه .... ممكن نعرف الدافع؟

و الله يا مستر ما عارفه اقول لحضرتك ايه و لردودك الرائعه دى
بجد انت شخصيه جميله جدا و بنتعلم كتييييييييييير اوى منك بجد
حضرتك اخ كبير لينا و دايما بحب اقرا اى رد ليك علشان ابنى شخصيتى اكتر و اعرف اكتر
.......
سؤالى لحضرتك "مين الاقوى الحب قبل الجواز و لااللى بيجى بالعشره بعد الجواز"

زي العاده مش بنعرف نعمل معاك اي حاجه في الاسئله ونت بصارحه ملكش حل يا مستر

ويلا يا جماعه لسه معانا المستر مستمر علي كرسي الاعتراف للي عايزه يساله وياريت يا جماعه نفكره في اسئله كمان دي فرصه ما تتعوضش

» كرسي الاعتراف
» بدون مقدمااات ... صور من ارض الواقع ( الجزء التاني )
» الجدول الدراسي :: أولي صيدلة :: الترم التاني
» ورأيتها (الجزء التانى)
» سابق ولاحق الجزء الاول