حوار مع الكبار ود/ كامل البرمبالي

دا حوار فى 3 اعضاء فى الجمعية الأدبية عملوه مع د/كامل عن حياته الشخصية و رحلته فى الكلية ... فى اسئلة كتيرة د/كامل رفض يجاوب عليها و فى اسئلة رد فيها باختصار شديد

د كامل بنرحب بحضرتك معانا في حوار مع الكبار مع الجمعيه الادبيه
دي الحلقه التانيه من برنامجنا وكانت اول حلقه مع د مختار مبروك عميد الكليه وبعد كده عملنا استفتاء علي منتدي الجمعيه الادبيه فحضرتك اخد اجماع الاصوات وبناء علي ذلك الطلبه نزلت اسئله تحب تسألها لحضرتك علي لسانا فياريت صدر حضرتك يتسع لينا واهلا بحضرتك مره تانيه

اهلا بيكو جميعا

1- نبدأ مع حضرتك بالبطاقه الشخصيه والعائليه؟

كامل محمد البرمبالي مواليد قريه برمبال بمحافظه كفر الشيخ
تاريخ الميلاد 12/12/1947

معني كده ان عيد ميلاد حضرتك يوم السبت كل سنه وحضرتك طيب يا دكتور
وانتوا طيبين

الحاله الاجتماعيه زي ما انتوا عارفين اني ارمل وعدد الاولاد بنت واحده اسمها دنيا كامل محمد البرمبالي 25 سنه خريجه تجاره عين شمس

2- حضرتك شخص عصامي او ايه مدي تدخل الاسره في تكوين شخصيه د كامل؟
انا انتمي الي الطبقه المتوسطه من ريف مصر من قريه اسمها برمبال وخريج صيدله الاسكندريه يوليو 1970 بتقدير جيد جدا

3- مشوار حضرتك مع الصيدله؟
المشوار:
اول حاجه اتعينت صيدلي في وزاره الصحه بالرغم من ان تقديري كان جيد جدا وفضلت سنه في وزاره الصحه وبعد كده جه تكليفي بناء علي طلب مني وانتقلت الي العمل في مركز الابحاث والرقابه الدوائيه وقعدت 5 شهور هناك وبعد كده نزل اعلان في صيدله اسيوط لاختيار معيدين وتقدمت للاعلان واشتغلت معيد في جامعه اسيوط من مايو 72 الي تقريبا مايو 75 كان في الوقت ده تم انشاء كليه الصيدله في جامعه طنطا فأنتقلت الي كليه الصيدله بجامعه طنطا عشان اكون بالقرب من العائله واخدت الماجستير من جامعه طنطا وكنت اول واحد اخد الماجستير من كليه الصيدله جامعه طنطا في ابريل 78 وسافرت في منحه تبع هيئه التبادل الثقافي الالماني واستكملت دراسه الدكتوراه وقعدت هناك 4 سنين واستكملت الجزء العملي بجامعه هامبرج وخلصت الجزء العملي تماما هناك وبعد كده رجعت واستكملت الجزء النظري بجامعه طنطا وحصلت علي الدكتوراه في الكيمياء الصيدليه سنه 83 تحت عنوان

organic synthesis with o-alkoxy acetophenone بالاشتراك مع جامعه ماريورج ومجموعه من الاساتذه هناك

4 - حضرتك كنت معيد في قسم الكيمياء الصيدليه واخدت الدكتوراه في الكيمياء الصيدليه ليه حضرتك اخترت الكيمياء العضويه بالذات؟
لان انا كان تخصصي في الكيمياء العضويه وزي ما قلت كانت رساله الدكتوراه كانت تحت عنوان
organic synthesis with o-alkoxy acetophenone

5-طبعا حضرتك عارف ان كل الطلبه بيشتكوا من صعوبه ماده الكيمياء العضويه هما بيسألوو حضرتك ليه نسبه الرسوب في العضويه اعلي من المواد الاخري وليه قدره الطالب علي الاجابه فيها بتكون ضعيفه
بمعني اخر ايه مشكلتنا مع العضويه؟؟؟؟؟؟؟؟

دي الحقيقه مشكله متعدده الاسباب
اول حاجه ان الوقت المخصص للماده في اللائحه (عدد الساعات المعتمده) غير كافي للماده العلميه وبالتالي الطالب مش بيلاقي الوقت الكافي انه يذاكر ويحل التمارين

معني كده ان وقت الترم اقل من حجم الماده نفسها؟
ايوه
يعني احنا عندنا تكدس في الماده العلميه؟
ده صحيح عشان كده الكليه عملت النظام الجديد اللي بيقسم الماده علي 3 تيرمات

السبب الاخر : ان الطالب منتج من مدرسه ثانوي او تعليم ثانوي يعتمد اساسا علي الحفظ يعني انا في طريقه تدريسي معظم الاسئله بتكون تطبيقيه وده احد المشاكل ان الطالب مش متعود علي طريقه التطبيق في المذاكره ولا الابداع

السبب التالت: عدم وجود مراجع كافيه في المكتبه والاعتماد علي الكتب الجامعيه بس

يعني الكتب الجامعيه لوحده مش كفايه؟
لاء لاء وانا بقول من دلوقتي الكتاب الجامعي لوحده مش كفايه

يعني الامتحان مش بيجي من الكتاب الجامعي بس؟
لا الامتحان حاجه والتعلم حاجه تانيه
عشان نتعلم لازم يكون في كتاب واتنين بالاضافه للكتاب الجامعي

بس زي ما حضرتك قولت ان وقت الترم اساسا مش كافي للماده ازاي بقي هنطلع المكتبه ندور علي حاجات زياده؟

ماهو عشان كده الكليه تداركت هذا السبب وخلت دراسه الكيمياء العضويه علي 3 تيرمات

طيب بالنسبه بقي للطلبه القدامي في الكليه اللي اخدوا العضويه في ترم واحد وشالوها؟

ده بقي نصيبهم ربنا معاهم

6- طيب حضرتك شايف ان في فجوه بين الطالب والاستاذ الجامعي ؟

بالتأكيد انا ايام ما كنت معيد كنت اعرف الطلبه واحد واحد بالاسم بالتقدير بكل حاجه انما في ظل هذه الاعداد الكبيره دي في فجوه بالتأكيد وده بينعكس علي التحصيل مقيش connection بين الاستاذ والطالب

يعني لو الطالب احتاج الاستاذ الجامعي في حاجه ولجأله بيخاف انه يطلع لدكتور يقوله انا مش فاهم جزء معين وبيخاف ان الدكتور يتهمه بالتقصير ومن هنا بتنشأ الفجوه بين الطالب والدكتور

السبب في ده ان الاستاذ معندوش وقت لالف طالب فلو في الوقت الكافي مش هيبقي في مشاكل

طيب ممكن ندور علي حل ان يكون في مثلا مندوبين من الطلبه او من كل مجموعه طالب يوصل للدكتور الطلبه محتاجه ايه

اه ده احد الحلول بس مش الحل المثالي
الحل المثالي من الطالب للدكتور نفسه direct

7- ايه راي حضرتك في الابحاث في مصر وبالاخص جامعه طنطا وهل حضرتك بتشتغل ابحاث دلوقتي؟

انا بكمل ابحاث الدكتوراه اللي بعملها من سنه 83

يعني حوالي 26 سنه وحضرتك بتعمل ابحاث في نفس المجال؟

اه ومغيرتش مسار ابحاثي غير مره لما رحت الولايات المتحده في مهمه علميه في جامعه مانيتوشا اشتغلت في مجال مختلف خالص مع استاذ جامعي وبعد كده رجعت كملت ابحاثي

8- رأي حضرتك في خوف الطلبه من انهم يدخلوا شفوي ل د /كامل
يعني بعض الطلبه لما بيلاقوا ان الشفوي بتاعهم مع د/ كامل بيخافوا انهم يدخلوا الامتحان ويمكن ده بيأثر علي انهم مش بيعرفوا يجاوبوا كويس في الشفوي ومش بس حضرتك لا كمان دكاتره كبار عندنا زي د/ الضوي و د/ مصطفي كمال يعني حضارتكوا اعلام مميزه في الكليه يعني اول الطالب ما بيدخل اعدادي بيسمع عن د/كامل د/الضوي و د/مصطفي كمال ؟؟؟؟؟؟

شوفي الطالب الشاطر ما بيهموش مين بيمتحنه

يمكن الفجوه بين الطالب والاستاذ الجامعي هي السبب؟

يمكن

طيب الشفوي بتاع حضرتك بيبقي من ايه؟

الشفهي بيبقي من الكتاب وبيكون مقيد تماما بالكتاب الجامعي يعني المشكله مش بتكون مشكله دراسه وبتكون الاسئله عاديه جدا

طيب الاستاذ الجامعي بيراعي ان الطالب بيكون خايف او قلقان فده بيأثر علي اجابته
بمعني اخر
هل ممكن الاستاذ الجامعي بكسر الحاجز النفسي بينهم؟

ممكن العمليه سهله بس بخبرتي احب اقول ان الطالب الشاطر او اللي فاهم شغله مبتفرقش معاه مين الدكتور اللي بيمتحنه

9-حضرتك مع الامتحان الشفوي في تققيم مستوي الطالب؟
لا انا في رأيي ان احسن حاجه لتقييم مستوي الطالب هو الامتحان النظري

طيب والعملي؟

الامتحان العملي في ظل الامكانيات بتاعتنا لا تخدم الطالب
االامتحان العملي عندنا هزيل

يعني مفروض ان درجات الشفوي في العضويه لازم تقل شويه؟
اعتقد او يكون في طريقه احسن من كده

طيب ودرجات الرأفه؟
انا ضدها تماما
الحد الادني والاعلي لدرجات حضرتك في الشفوي؟
في ناس بتاخد 95 من 100 كل ده بيعتمد علي الطالب نفسه وعلي اجابه الطالب انا مش بحط حد ادني او حد اعلي للامتحان

سمعنا ان حضور الامتحان عليه درجات؟
لاء انا في طلبه مش بشوفها خالص الا في الامتحان الشفهي صحيح بهددهم بس في الامتحان بنسي كل حاجه

الحضور نفسه في الامتحان الشفوي عليه درجات؟
لاء بالنسبه لي لاء
انا بمتحن الطالب شفهي في ورقه والورقه دي بتعكس تماما مستواه ولا يدخل في اعتباري أي عامل اخر
لا علاقتي الخاصه بالطالب ولا بحضوره المحاضرات ولا حضوره العملي ولا أي حاجه اجابته فقط هي الاساس

11- وسائل الايضاح اللي اللي حضرتك بتستخدمها في المحاضرات؟
انا بستخدم operator projector

طيب والموديلز؟
دي شيء رئيسي

طيب المويلز مع العدد الكبير للطلبه وسيله كويسه؟
لا هي وسيله لا تجدي الصراحه بس احسن من قلتها

طيب في ناس كتير بتبقي قاعده ومش شايفه وبيبقوا فعلا مش فاهمين حاجه خالص؟
ماهو ده هيرجعنا تاني للعدد الكبير

طيب ممكن نرجع لحضرتك تاني هنا تشرح لنا علي الموديلز؟
اه طبعا اوي اوي وانا اتحدي أي طالب ييجي يقولي انا عايز اشوف الموديلز وماوريتهالوش

يعني في ناس طلعت لحضرتك عشان تشرحلها تاني؟
اه كتير

طيب في ساعات مكتبيه نقدر نيجي فيها لحضرتك؟

اه متعلقه ع الباب برده

12- رأي حضرتك في الرأي اللي بيقول ان الاساتذه الجامعيين يتفرغوا للابحاث وخاصه العلماء منهم ؟

والله دي فكره كويسه بس المشكله ان في نقص حاد في اعداد الاساتذه الجامعيين (اعضاء هيئه التدريس) وخاصه في الجامعات الاقليميه انما دي فكره جيده جدا وياريت يكون في عدد يسمح بذلك وانا اول واحد مستعد اني انفذ الفكره دي

في لقاءنا مع د/ مختار مبروك قالنا ان المشكله ان مفيش وقت للاساتذه انهم يقوموا بابحاثهم وعندهم ضغط مكثف اوي فدي مشكله بالنسبه لهم؟

طبعا فياريت يبقي زي ما بيحصل في الجامعات في الدول الخارجيه انهم يمارسوا العمل بتاعم ويكون ليهم وقت للابحاث بتاعتهم كل دكتورهناك بيبقي واخد عدد محدود جدا في المحاضرات في كل تيرم حوالي 4 ساعات مثلا انما هنا معظمنا واخد في الترم اكتر من 20 ساعه فالمشكله ان عدد اعضاء هيئه التدريس
يعني لو العدد كافي او just enough انا اول واحد اؤيد هذه الفكره

طيب ازاي نعوض النقص في عدد اعضاء هيشه التدريس؟
يعني نعين معيدين ودلوقتي الكليه بقالها فتره بتعين العشره الاوائل كلهم بعد ما كانت بتعين اتنين او ثلاته بس

13- رأي حضرتك في خريج كليه الصيدله دلوقتي هل يعتمد عليه انه يبقي دكتور صيدلي ومسئول عن ارواح اشخاص وهل الماده العلميه اللي هو بيدرسها كفايه؟

والله هو لو كان جاد في دراسته ومن الطلبه الجاديين اعتقد انه ينفع

هل المناهج بتوفر ده؟
اه بتوفر وخاصه في كليه الصيدله جامعه طنطا حتي لو كان طالب عادي مش متفوق اعتقد ان المعلومات اللي حصل عليها ودرسها كافيه جدا

يعني المناهج في كليتنا بتأهل الطالب للحياه العمليه؟
ايوه وخاصه طالب صيدله طنطا لانها صيدله اكلينيكيه ولان الطالب بيدرس اكلينيكي

طيب وليه مش مكتوب كده في الشهاده الجامعيه بيبقي مكتوب حاصل علي بكاليوريوس في العلوم الصيدليه فقط ليه مش العلوم الصيدليه الاكلينيكيه؟
دي بقي مسأله اداريه انا مليش اني اتدخل فيها

حضرتك شايف ان نسبه الطلبه الجاديين في الكليه قد ايه؟
احنا بنفرق بين 2 categories البنات والولاد
بالنسبه للجاديين من البنات عاليه انهم منتظمين ومنضبطين وبيحضروا محاضرات وده بيبان في المعيدين ان معظم المعيدين بنات انما بالنسبه للولاد بيبقوا مطنشين

بس في أراء بتقول ان الولد اذكي من البنت وبيكون احسن من البنت في التحصيل يعني بيفهم بسرعه اكتر من البنت؟ يعني بيفهم الحاجه علي طول

لاء لاء هذا رأي خاطيء وفكر خاطيء في بنات شاطرين جدا واحسن من الولاد

طبعا دي شهاده نعتز بيها يا دكتور
لا اصل ده الحق يعني

14- ايه رأي حضرتك في الانشطه الطلابيه ؟ وهل حضرتك بتشجع ان الطالب يقوم بنشاط طلابي بجانب الدراسه؟

طبعا المفروض الطالب يقوم بانشطه طلابيه وانا بشجع الانشطه الطلابيه ما عدا النشاط السياسي

طيب ماهو ممكن يكون في نشاط سياسي سلمي او مظاهره سلميه؟
لاء خالص ولا أي حاجه النشاط السياسي يكون خارج اسوار الجامعه

طيب ليه؟
لان الطالب الجامعي و ظيفته التحصيل والدراسه انما نشاط سياسي داخل الجامعه انا ضده

طيب بالنسبه للانشطه غير السياسيه؟
لا براحته يمارس أي نشاط يمارس نشاط ادبي نشاط رياضي كل الانشطه ماعدا السياسي

طيب حضرتك متابع انشطه معينه في الكليه؟
لا بصراحه مش متابع

15- رأي حضرتك في النظام المعتمد الجديد (الصيدله الخاصه)؟

انا بصراحه عندي تحفظ عليه وبتسائل هما هيدرسوا ايه زياده عنكوا
بس ندعه للتجربه تحكم عليه

طيب حضرتك تتوقع ان نظام الصيدله الخاصه ده عشان مفيش ميزانيه في الكليه
يعني الطالب بيدفع 10 الاف جنيه في السنه فده هينفع الكليه عشان الابحاث مثلا او تطوير المعامل حاجات من كده يعني؟
لا انا معرفش رأي الاداره في الموضوع ده

يعني اداره الكليه مأخدتش رأي الدكاتره في الموضوع يعني هو قرار اداري بحت؟

لا انا ما اعرفش بس انا محدش خد رأيي معرفش اذا سألو دكاتره تانيين ولا لاء

اكيد حضرتك من الاعلام المضيئه في الكليه فلو سالوا أكيد كانوا هيسألو حضرتك
معرفش
بس فلسفه الفكره نفسها انا مش عايز اتكلم عنها لاني معترض عليها

وفي النهايه د/ كامل بنحب نشكر حضرتك جزيل الشكر علي هذا الحوار الشيق والمهم اللي الطلبه كلها كانت مستنياه عشان تعرف جوانب اخري من شخصيه د/ كامل البرمبالي واسفين لو كنا ازعجنا حضرتك او عطلنا حضرتك

شكرا ليكو جميعا

وكان هذا الحوار الذي قمنا به مع د/ كامل البرمبالي
مع خالص شكرنا ل د/ كامل
ونحب نقوله كل سنه وحضرتك طيب يا دكتور

منقوووووووووووووووووووول
من منتدى الجمعية الأدبية

ياااااااااااااااااااااااااااااااااااااااااااه ع البساطه،بجد لو كانت دى اجاباته فده بيعكس عن شخصيه طيبه جداااااااااااااا وده اللى بحسه فيه والله انه عبقري و اتظلم ومر بحاجات دمرته نفسيا او تعقد من علمه او كده...
بس كان نفسي المحاور يسأله سؤال وااااااااااحد:ليه دكتور كامل مبيضحكش؟؟؟؟؟؟؟؟؟؟؟؟؟

[quote="AhmedHelal"]

بس كان نفسي المحاور يسأله سؤال وااااااااااحد:ليه دكتور كامل مبيضحكش؟؟؟؟؟؟؟؟؟؟؟؟؟

[/quote

حد يشوف دفعة زينا ويضحك

ههههههههههههههههههههههههههههه

او كان ممكن يساله......ليه بيكره الصبيان اوي؟؟؟؟؟؟؟؟؟؟؟؟؟؟؟؟؟؟

رايى من زمان ان الدكتور كامل عالم لا يعلم
او ممكن نكون احنا اللى مش واصلين ليه

» حوار بين ذكر وانثى
» ورق جزء د/سوزان كامل فى مكتب التصوير
» القرآن الكريم كامل بصوت الشيخ / عبد الله الجهني .
» ألبوم كامل موسيقي تركي روعة ( لازم يتسمعوا )
» حوار مع الحب