بنوته
بنوته وصدفه قابلتنى
وبكل براءه سالتنى
طريق بيتها
كانت تايها ومش عارفه
فين سابتها جدتها
فسالتنى !!!
بصيت فى عنيها لقيت الدمعه خلاص هتسلم
ولقيت قلبى بيدق بصوت مسموع عايز يتكلم
وف ثانيه لقتنى واخدها فى حضنى مدارى عليها
لمست دمعتها ايديا خانتنى عنيا ودموعى شافتها عنيها
بصلتى وكانها عايزه تطمن قلبى عليها
حسيتها كانها امى بنفس الطيبه ف عنيها
حبيتها وهى حبتنى
وبضحكه تانى سالتنى
طريق بيتها
المره دى هى سبقتنى
وحضنتنى
وفضلت ادور ادور لحد الشمس ماغابت
وبكل براءه مالت على كتفى ونامت
ومشيت وانا نفسى الاقى جدتها ومش الاقيها
هرتاح انا لو وديتها لغايه بيتها
ونفسى معايا اخليها
وف وسط طريقى لقيت صوت قلب بيصرخ حواليا
وحاجه جايه بعيد سرعتها تزيد وعنيها عليا
اتاريها جدتها
من حضنى خطفتها
حضنتها وحضنتها ميت مره ولسه اللهفه جوا عنيها
واخيرا بعد كتير اوى لما شافتنى .... شكرتنى
وخلاص راجعه وهتسبنى
رجعتلى البنوته تانى وحضنتنى
وكانه وداع وقالتلى
انا بعرف ارسم
ووعدتنى فى المره الجايه هترسمنى
وروحتلها ورسمتنى
رسمتنى فى قلب كبير انا وهى
ونجوم وورود ولعبها الحلوه حواليا
ومشيت وف بالى اشوفها فى اليوم الجاى
وبفكر هستحمل يجى بكره ازاى
وبفكر برضه هترسم ايه
وجه بكره وبرضه رسمتنى
