يوميات صيدلي تحت التدريب

السلام عليكم

الفكره النهاره باينه من اسم الموضوع وهيا يوميات

يعني بالنسبه للدكاتره اللي نزلو تدريب صيفي في صيدليه وكده يبقوا يحكولنا

اليوميات اللي بتحصل واللي غالبا بيكون دمها خفيف وبتكون لذيذه

وطلعا المواقف دي مش بتيتنسي خالص

والموقف اللي حاي ده من احد المنتديات لدكتور عضو فيه بس انا حبيت انكم تشوفوه لان فعلا عجبني

منقوووووووووووووووووول

لاحظت ان دايما لما نشتكى ان الكليه صعبه وان شغلانه الصيدلى دى متعبه
يرد اصحابنا : ياااااابنى دى كليه تافهه و مفيش اسهل من كده
دانت يدوب هتقف تبيع الدوا و دى مش مضلعه دا الدبلومات بيعملوا احلى شغل فى الصيدليات
و كان صيدله دى اصلا معهد و الحكومه مست و عملتها كليه
ميعرفوش ان الواحد مننا على ما يوصل لمرله انه يطلع دوا و يعرف يوصف علاج لحد
بتطلع عينه
و بيعانى من حاجات كتير
انا مش هتكلم عن الحاجات الكتير انا هازكر جانب واحد من معاناته
اللى هيا اجازته الصيفيه و بيقضيها ازاى فى التدريب
وانتوا تحكموا بيتعبوا ولا لاه
شوفوا بقى
يصحى من النوم حاجه من اتنين اما انه يروح يجيب فطار
او يكون حد حن عليه ونزل بداله و هو يفطر بس
ده لو هو صحى على الفطار اساسا انما هو دايما يصحى على الغدا
بعد الاساسيات
الصلاة و الاكل و الذى منه اللى بتختلف من واحد للتانى
يييجى دور الوالد و الوالده و النصايح الغاليه
يقولوله :
هااااااااااااا ايه اخبارك فى الصيدليه يا دكتور ؟؟؟
يقول : تمام الحمد لله
هاااااااااااا عرفت اماكن الادويه ؟؟
يقول : اه الحمد لله
هااااااااا بتعرف دلوقتى تدى حقن و تقيس الضغط؟؟
يقول اااااااه هو مين اللى بيديكم حقن
الغريب ان نفس الاسئله بتتكرر كل يوم و غالبا فى نفس المعاد
و لو بينلهم انه متدايق
يقولوا :
ياااااابنى الحق علينا انت حر اديك شايف فلان اهو ندامن انه مستغلش فتره الاجازه فى التدريب
يقولهم وانا يعنى قولت حاجه......
ده غير الاحراج اللى بيتعرضله فى البيت
ما يصدقوا يلاقوا شريط دوا مش عارفين بتاع ايه
يسالوا الدكتور مهو صيدلى بقى
الاااااا الدوا ده بتاع ايه يا دكتور
طبعا الدكتور مش بيبقى عارف
و ياسلام لو قال معرفش هيفتح على نفسه فاتوحه
و تفاديا للمشاكل اما انه يشوفه فى الاندكس و يلحق نفسه
او يرتجل و يقول حاجه من دماغه بس هنا بقى يقول فى الاخر
بس ماتخدوهووووووش فى دوا تانى احسن منه
نيجى بقى لاهم فتره التدريب فى الصيدليه
تلاقى الواحد من دول ساحبله كشكول و رايح على الصيدليه
بيبقى هو الوحيد اللى ماشى فى الشارع ماسك كشكول فى ايده
و قلم فى جيبه
ولو قابله واحد من اصحابه يقوله
اييييييه يابنى انت مخلصتش امتحانات؟؟؟
يقوله : لا يا سيدى دانا رايح الصيدليه
صاحبه يضحك و يقوله بكراسه ربنا يعينك
بس ما علينا مهو مستقبله ولازم يستحمل كلام الناس و نظراتهم
يدخل الصيدليه بلاقى الدكتور بيبصله و يبص للساعه
و يقوله اهلا .....
غالبا بتبقى مصحوبه بابتسامه صفراااا تنم عن مدى حبه ترحيبه بيه
و يقوله جاى متاخر ليه يا دكتور عايزك تلتزم علشان تتدرب كويس
تقولش بيديله فلوس على الوقفه فى الصيدليه و لا يمكن مشغله عنده
و كالعاده يحصل زى كل يوم
الدكتور يحط وشه فى دفتر النواقص و الملفات
و العروض اللى من المخازن و شركات الادويه
و كان اللى قاعد على المكتب ده رجل اعمال و صاحب مجموعه شركاااات
هنا بقى الغلبان ميلاقيش قدامه الا الأدويه اللى حواليه من كل حته
و يفتح الكشكول بتاعه و يمسك القلم _ده على اساس انه هيكتب حاجه_
و يعمل زى كل يوم
يتفرج على التليفزيون اللى غالبا بيبقى مفتوح على برنامج رياضى
و بيبقى هيموت و يسال الدكتور فى حاجه لكن هوا مين الدكتور مشغول جدا
و مش فاضى للعب العيال ده فبيكتفى بالتليفزيون و الفرجه على اللى رايح و اللى جاى
و اخيرااا... بدخل الصيدليه زبون يقوله شوفلى حاجه للبرد الله يكرمك
ما يصدق صاحبنا و يجيبله حابايتين كوجستال على حابيتين مضاد حيوى
هنا بقى يقوم الدكتور باشا من مكتبه و ياخد الدوا من ايد الغلبان و يرميه على المكتب
زى ما بيرمى الورقه الفاضيه فى الزباله
و يطلع للمريض حاجه تانيه
تقولش الدوا اللى الغلبان طلعه فى سم قاتل و المريض هوا ابراهيم حمدى
بس طبعا صاحبنا الغلبان لازم ياخد الحاجات دى بصدر رحب
ايه يعنى لما الدكتور يحرجه قدام المريض عاادى مهو الدكتور لازم يوصله انه
لسه مش عارف حاجه و ان لسه باااادى على ما يوصف دوا لحد
لييييييييييه لان البرد ده مرض خطيييييير و لو ملحقناش المريض
بالعلاج الصح _ اللى ميعرفوش الا الدكتور طبعا _ ممكن لاقدر الله يتطور لحاجات اخطر....
من الناحيه التانيه شوفوا بقى الزباين اللى تشل
يدخل واحد محترم و يقف ساكت
فصاحبنا الغلبان يبتسمله بصفاء نيه و يقوله : نعم ؟؟
يقوله بكل تنااكه :لالالالالالا انا عايز بس الدكتور ..
وكان اللى واقف قدامه ده عامل فى الصيدليه
و طبعا صاحبنا دماغه اكبر من كده يمكن هوا عايز الدكتور فى حاجه !!!
و للامانه يعنى الدكتور برضه بيراعى مشاعره
و يقوله هات كيس يا دكتور و مرر الدول على الجهاز يا دكتور
اهو يخلى البيه يحس ان اللى واقف ده دكتور مش كيس قطن
و فى دى بقى الدكتور بيستفاد ليييييه لانه دايما ينسى يمرر الدوا على الجهاز
فيقول للغلبان : انا عايزك بقى تمرر الدوا اللى انا بصرفه على الجهاز
علشان تحفظ اسامى الادويه بسرعه
طيب قوى الدكتور و حنين
يدخل واحد تانى و يقول : عايز كذا و كذا بس يكونوا طازه الله يكرمك..
اهى طازه دى انا مبسمعهاش الا لما نشترى زبادى
بس و ماله زى مانتوا عارفين الزبون دايما على حق ....
و يسلام بقى لما يدخل واحد رزل متعود على دوا معين بياخده كل يوم بالليل
ييجى و يقول هاتلى حابيتين .. كذا ..
ييجى صاحبنا يحسبله سعرهم
يقوله : انت لسه هتحسبلى ؟؟؟ الواحده بجنيه و ربع خلص يا استاذ
طبعا صاحبنا يتنرفز و يقوله : معلش اصلى اول مره ابيعهم انما انت بتاخدهم كل يوم
فحافظ سعرهم
و لسان حاله بيقول للمريض ياااااااااعم روح ادارا فى حته جتك خيييييييييبه ...
بس طبعا صاحبنا بيقدر حاجله الزبون المعناويه لما بيشترى الحبوب دى
تييجى بقى لواحده داخله عايزه صابغه شعر لونها كوستنائى
طبعا هو مش عارف اللون ده شكله ايه لكن بيدور لحد مايلاقيه
و يديهولها تقوله لالالالالا ده احمر !!!
يقولها : مهو مكتوب عليه اهو كستنائى ..
تقوله : يعنى انت مش شايف اللون ؟؟
واحده تانيه يلاقيها داخله عايزه فرشه اسنان
بسيييييطه دى
يجيبلها فرشاه
بس طبعا متعجبش الهانم يغيرها برضه متعجبهاش

يقولها : انتى عايزاها ازى يعنى؟
تقوله : لالالالالالا انا عايزاها خضرا ..
يقولها : هو انتى هتمشى بيها فى الشارع ؟؟؟
تقوله لا علشان اللى يستعملها يبقى فرحان .
بس عموما هما البنت كده بيحبكوها فى الحاجات دى
اييييييه يعنى احمر من كوستنائى !!!!!
و ياسلاام بقى لما تييجى روشته يمسكهافى ايده و يبصلها وهو مزبهل
طبعا هو مش عارف يقرا اللى فيها لان الدكتور اللى كاتب الروشته الله يكرمه خطه جااااامد
حلو قوى
و حاجه غريبه دايما يبقى مع اللى بيصرف الروشته عيل لمض
يقول لابوه : ههههههههههههه الحق يابابا ده مش عارف يقرا ....
و ابوه يقوله بس يا حماده سيب عمو يركز
و دايما فى الحالات دى بتييجى البنت اللى بتشتغل فى الصيدليه و تنقذ الموقف
و تصرف الروشته بكل بساطه
و تقول للزبون : معلش اصل الدكتور لسه بيتدرب ..
و تلتفت للغلبان اللى فى نص هدومه
و تقوله بإستفزاز :انت لسه مش عارف تقرا الروشتات ؟؟؟
بس بتقولها بصوت واطى على اساس ان الواد وابوه مش هيسمعوها و هى بتكلمه
اما بقى درج الفلوووووس فدى مصيبه لو الدكتور شافه مفتوح ممكن يجراله حاجه
و يروح فيها
و لازم ينبه على كل اللى فى الصيدليه محدش يسيب الدرج مفتوح احسن الهوا يطير الفلوس
معرفش الهوا هييجى للدرج منين
بس اهى وجهة نظر هو حر
و لازم اللى بيتدرب فى دى بالذات يراعى مشاعر الدكتور
و هكذا بعد اربع او خمس ساعات يوميا من الزجار المتواصل مع الدكتور و العيانين
و الهانم اللى بتشتغل فى الصيدليه يروح بيته تعبااااان ....
تقوله والدته اللى بتبقى مستنياه:
هااااااااااااااا ايه اخبارك يا دكتور
يقولها : تماااااااااااااااااااام هو الدكتور بيبيع من عيرى !!!
لان زى مانتوا عارفين هو اللى بيمرر الدوا على الجهاز ...
هاااااااااا ايه رايكم بيعانوا ولا لاه؟؟؟؟
ملحوظه يعنى : الكلام ده بيبقى فى اول التدريب
انما بعد مده بياخد ويدى مع الادويه
و اوعوا تخافوا من اللى بيتدرب فى الصيدليه
هو صحيييييح بيعمل حاجات ساعات تودى الدكتور فى داهيه
انما مش قصده
مستنى رايكم
سلام بقى علشان اتأخرت على الدكتور
ههههههههههههه

انا بقي اول يوم نزلت فيه الصيدليه قعدت ييجي ساعه واقف حتى الدكتور مكلمنيش نص كلمه وكنت هموت واروح بس استحملت وقعدت قام الدكتور خلص الزباين اللي معاه قعد يحكيلي بقي عن ازاى اكون صيدلي ناجح واحب الحاجه اللى بدرسها،المهم روحت تنى وتالت يوم كنت ماسك الحسابات بس هات كذا يا دكتور خد كذا يا دكتور وانا قاعد هولع بس الحمد لله.بعد كده بدا يديني كل يوم روشتتين اقاهم واحطهم جنب اخواتهم وقعد اتامل فيهم،بعد كده يوم بعد يوم بدا يديني اسم ماده فعاله كل يوم وانا اطلع الادويه بتاعتها من الصيدليه والحمد لله قعدت علي كده بتاع10 ايام كده او اسبوعين لحد ما جه عمو قلبظ ووحت معاه..هههههههه

وهى دى قصه حياتي.

طيب هلال ما تحكى الموقف اللى انت حكيتهولى بتاع الراجل اللى كان عاوز حاجة و شاف راجل بياخد حاجة تانيه فخد منها

انا بقه اما نزلت التدريب حصلى موقف قعدت اضحك عليه اسبوع فى واحده عندها مرض فى العظام وبعد ما صرفت الروجته قالتلى والنبى يا دكتور هتعبك معايه متقرالى كدا النشره بتاعت العلاج دى قلتلها من عنيه يا حاجه
وبدا اقرائلها الاستعمال وكدا قالتلى لا قلى الاثار الجانبيه قلتلها مكتوب يا حاجه انه بيعمل صداع وامساك والم فى البطن وكدا بس طبعا دا كلوا للى عنده حساسيه للماده الفعاله اللى فى الدوا
هى سمعت الكلمتين من هنا وقالت والله العظيم منا واخده الدوا انا ناقصه صداع وامساك ومشت ورجعت الدوا
تانى يوم جت وتقلى والنبى يبنى هو ممكن تعمل حاجه علشان ميجليش صداع من الدوا واخد الدوا عادى
انا سمعتها بتقلى كدا وساعه ما مشت انا مش مسكت نفسى من الضحك
بجد بتحصل مواقف فظيعه وللحديث بقيه لسه فيه مواقف كتيييييييييييييير

bahy كتب:: طيب هلال ما تحكى الموقف اللى انت حكيتهولى بتاع الراجل اللى كان عاوز حاجة و شاف راجل بياخد حاجة تانيه فخد منها

هههههههههههههههههههههههههههههههه
ههههههههههههههههههههههههههههههههه
ههههههههههههههههههههههههههههههه
ههههههههههههههههههههههههههههههههه
الله يباركلك ضحكتنى وانا ملبش نفس بس للاسف مينفعش ادام الناس

لا و الله يا ابو على انا لغاية دلوقتى مشفتش اى حاجة تتضحك من ساعة ما روحت التدريب فى الصيدلية حاسس انى قاعد فى قسم طوارىء مش صيدلية

اقولك بقى على الحاجات الحلوة اللى شفتها

تغيير جرح قرح وردية

تغيير حرق درجة تالتة متتخيلش المنظر كان عامل ازاى

تغيير جرح عملية بتر نتيجة غرغرينة

تغيير جرح فى قدم مريض سكر دا بقى اللى مستحيل تتخيل منظره كان عامل ازاى

كفاية عليكو دول ..........

انا جسمى بقى يقشعر كل اما ادخل الصيدلية من اللى بشوفه فيها

ايه يا عم صيدليه دي ولا وحده تغير علي الجرووووووووووح

ما تخلي الناس عندكو تحافظ شويه

انا بقي النهارده جاتلي واحده عايزه حقنه الامبول اللي جوه ابيض ومكتوب عليه بالاصفر

قولتلها طيب هو لايه؟ قالتلي مسكن قولتلها المسكنات كتير
قالتلي هو بيبدا بحرف ال t اعدت ادور عليه وي الاخر مجبتهوش وفين بقي علي ما الدكتور جه علي بالليل جت تاني قولتلو سيبك يا دكتور من الست دي دي بتقول فوازير فالمهم الحمد لله وبعد معناه اكتشفنا انها كانت عايز mobitil يعني مش حرف ل t خالص اما باصا ليا وضحكت

نعمل ايه بقي الزبون دايما علي حقققققققققق

هههههههههههه فى مواقف عجيبه بتحصل والله وكمان حقنه موبيتيل دى لالم العظام يعنى حتى مش حدد نوع المسكن يلا بقى نستحمل والثواب عند ربنا

أنا بقى حصلى موقف لو حصل لحد فيكم هيسيب الصيدليه خالص

كان جالى واحد ست عاوزه دوا معين جبتهولها وقولتلها الحساب 3.75 قرش الست قامت

حاططه ايديها فى جيبها وطلعت 3.50 وتقوللى حلو كده كفايه عليك قولتلها

مينفعش هو أنا اللى مسعره هو دا تمنه مش عاجبك روحى للدكتور قوليله (مع ان

الصيدليه اصلا مفيهاش دكتور ) المهم قعدت تزعق معايا فجه الدكتور قالها

فى ايه يا ست انتى عارفه انتى بتكلمى مين دا دكتور صيدلى (اللى هو أنا ) قالتله

دا دكتور صيدلى ده مش باين عليه يعنى من هنا بقى وأنا اتنرفزت فقولتلها ايه

مش باين عليه دى انتى شايفا قدامك بياع طماطم واتخانقت معاها المهم مشت

فالدكتور بقى بيقولى هو انت ناوى تفتح صيدليه ان شاء الله (بيتريق بقى )

قولتله انا اصلا لو فكرت أفتح صيدليه عمرى ما هقعد فيها بعد اللى شوفته

النهارده .

دى حكايه واحده بس من حكاياتى لكن لسه فى كتييييييييييير اوى

استنونا العدد القادم .

» تحديث التدريب الصيفي
» يوميات طفل شقيان جدا